Türkmen edebiýaty türki halklaryň umumy medeniýetinde aýratyn orny eýeleýär. XVIII asyryň beýik nusgawy şahyrlary — Döwletmämmet Azady bilen Magtymguly Pyragynyň döredijiligi türkmen milli şygryýetiniň esaslaryny döretmek bilen birlikde, häzirki döwrüň nesillerine-de ylham berýär diýip, “Türküstan” neşiri belleýär.

Şahyrlaryň eserleri halkyň gymmatlyklaryny beýan edip, geçmiş bilen şu günüň arasynda baglanyşyk döredýär we milli özboluşlylygy pugtalandyrýan möhüm medeni çeşme hökmünde çykyş edýär. Soňky onýyllyklarda türkmen ýazyjylary taryhy we jemgyýetçilik mowzuklara esaslanyp, klassiki mirasy täze görnüşlerde beýan etmegiň usullaryny öwrenýärler.

Halkara bilermenleriň belleýşi ýaly, Türkmenistan türki ýurtlaryň arasynda medeni hyzmatdaşlygyň ösdürilmegine işjeň gatnaşýar. Bilelikde durmuşa geçirilýän terjime taslamalary, edebi festiwallar we bilim başlangyçlary hyzmatdaşlygy giňeltmäge hem-de tejribe alyşmaga ýardam berýär.

Halkara bilermen Ekber Köşaly umumy türki edebi giňişligini ösdürmek üçin degişli okuw kitaplaryny, terjime institutlaryny we edebi antologiýalary döretmek, şeýle hem yzygiderli medeni çäreleri geçirmek zerurdygyny nygtady. Bu bolsa türki halklaryň arasyndaky ruhy baglary berkitmäge we edebi hyzmatdaşlygy täze derejä çykarmaga mümkinçilik berer.

Şeýlelikde, häzirki zaman türkmen edebiýaty diňe bir milli medeniýetiň gymmatly mirasyny saklamak bilen çäklenmän, eýsem, tutuş türki dünýäniň medeni gatnaşyklaryny ösdürmekde we halkara derejesinde tanadylmakda hem möhüm orun eýeleýär.