Türkmen telekeçileri 2025-nji ýylyň 14–16-njy oktýabry aralygynda Duşenbede “Ýaşyl ykdysadyýet: durnukly geljek üçin häzirkzaman mümkinçilikler” şygary bilen geçiriljek “Dushanbe Invest-2025” halkara maýa goýum forumyna gatnaşmaga çagyrylýar. Bu barada Türkmenistanyň Söwda-senagat edarasy habar berýär.

Forum döwlet edaralarynyň, maliýe institutlarynyň, halkara guramalaryň, işewür toparlaryň, maýadarlaryň we hünärmenleriň gatnaşmagynda geçiriler. Çäre diňe bir işewürler üçin platforma bolman, gatnaşyjylara Täjigistanyň medeniýeti, taryhy, däp-dessurlary we tebigaty bilen tanyşmaga giň mümkinçilik döreder. Munuň özi ýurduň maýa goýum hem-de syýahatçylyk mümkinçiliklerini açyp görkezmekde möhüm orny tutar diýip, çäräniň resmi sahypasynda bellenilýär.

Forum hökümet wekilleriniň, halkara guramalaryň, maliýe institutlarynyň, işewürleriň, maýadarlaryň we telekeçileriň arasynda duşuşyklary geçirmek üçin esasy meýdança bolup çykyş eder.

Çäräniň guraýjylary hökmünde Täjigistanyň Döwlet emläk dolandyryş we maýa goýum döwlet gullugy bilen Duşenbe şäher häkimligi çykyş edýär. Forum ýurduň Hökümetiniň goldawy bilen geçirilýär.