2025-nji ýylyň 1-nji awgustynda Türkmenistanyň Energetika ministrligi tarapyndan "Gaýtadan dikeldilýän energiýa çeşmeleriniň döwlet kadastryny ýöretmegiň we onuň maglumatlaryny ulanmagyň tertibi" tassyklandy. Resminama bu ugurda milli maglumatlar binýadynyň gurluşyny, düzüm aýratynlyklaryny hem-de ýörediliş düzgünlerini kesgitleýär. Bu barada "Merkezi Aziýada durnukly energetika gatnaşyklary” (SECCA) taslamasynyň metbugat gullugy sişenbe güni habar berdi.

Täze kadastr ulgamy, gaýtadan dikeldilýän energiýa çeşmeleri bilen baglanyşykly hereket edýän we geljekde hereket etjek desgalaryň meýdançalary, olaryň kuwwaty hem-de ýyllyk energiýa öndürijiligi baradaky maglumatlary özünde jemleýän merkezleşdirilen maglumat ulgamydyr. Şonuň bilen birlikde, energiýa öndürijileri baradaky maglumatlar ýurdumyz boýunça administratiw-çäk birlikleri esasynda görkeziler. 

Bu ulgamyň döredilmegi Türkmenistanyň energetiki mümkinçiliklerini seljermek, döwlet we sebit derejesindäki maksatnamalary işläp düzmek, ilaty, şol sanda elýeterliligi kyn bolan sebitleri energiýa bilen üpjün etmek, zyýanly gaz zyňyndylarynyň azaldylmagyny gazanmak hem-de bu ugra maýa goýumlaryny çekmek maksady bilen amala aşyrylýar.

Resminama Ýewropa Bileleşigiň "Merkezi Aziýada durnukly energetika gatnaşyklary" (SECCA) taslamasynyň wekilleri bilen hyzmatdaşlykda taýýarlanyldy. Hyzmatdaşlyk resminamanyň taýýarlyk işlerini utgaşdyrmaga mümkinçilik berdi. Kadastr ýazmaça we Ministrligiň saýtynda elektron görnüşde alnyp barylýar. Maglumat binýady yzygiderli täzelenip, kanunçylyk bilen goralan maglumatlardan başga ähli maglumatlar ilatyň elýeterliliginde bolýar.

2025-nji ýylda Türkmenistanyň Energetika ministrligi SECCA taslamasynyň teklipleri esasynda taýýarlanan “Gaýtadan dikeldilýän energiýa çeşmeleriniň döwlet energiýa ulgamlaryna birikdirmek” we “Elektrik energiýasy desgalarynyň howpsuz ulanmak” ýaly iki düzgünnamany tassyklady.