2025-nji ýylyň 22-nji awgustynda Türkmenistanyň Koreýa Respublikasyndaky ilçisi Begenç Durdyýew Seul şäherinde geçirilen “Uglerod bitaraplygy we ýaşyl ösüşi gazanmak üçin halkara hyzmatdaşlyk” atly halkara maslahatynyň açylyş dabarasyna gatnaşdy.

Çäräniň dowamynda ilçi Koreýa Respublikasynyň täze Premýer-ministri Kim Min Sok we ýurduň hökümet agzalary bilen duşuşyk geçirdi. Bu barada Türkmenistanyň Koreýa Respublikasyndaky Ilçihanasy habar berýär.

Ilçi Türkmenistanyň ýolbaşçylarynyň adyndan mähirli salamlaryny ýetirip, Premýer-ministri täze wezipä bellenilmegi bilen gutlady. Diplomat ikitaraplaýyn hyzmatdaşlygyň mundan beýläk-de üstünlikli dowam etjekdigine ynam bildirdi.

Koreý tarapy iberilen gutlaglar üçin minnetdarlyk bildirip, Merkezi Aziýa ýurtlary, şol sanda Türkmenistan bilen köpugurly hyzmatdaşlygy giňeltmäge gyzyklanma bildirýändigini tassyklady.

2025-nji ýylyň 15-nji awgustynda Koreýa Respublikasynyň Azat ediliş güni mynasybetli geçirilen dabaralaryň çäklerinde ilçi Begenç Durdyýew Koreýa Respublikasynyň Prezidenti Li Je Mýon bilen gysgaça duşuşyk geçirdi.