2025-nji ýylyň 25-nji awgustyndan 29-njy awgustyna çenli Türkmenistandaky BMG-niň Ösüş Maksatnamasy (BMGÖM) Türkmenistanyň Aragatnaşyk ministrligi bilen bilelikde ýurduň döwlet we hususy pudaklarynyň wekilleri üçin sanly özgeriş boýunça birnäçe okuwlary geçirdi. Bu okuwlar BMGÖM bilen Aragatnaşyk ministrliginiň 2026–2028-nji ýyllar üçin Türkmenistanyň sanly ykdysadyýeti üçin konsepsiýa we döwlet maksatnamasyny işläp düzmek boýunça bilelikdäki taslamasynyň bir bölegi boldy.

Okuwlara Türkmenistanyň 30-a golaý ministrliginiň we edaralarynyň wekilleri gatnaşdy. Maksatnama institusional mümkinçilikleri ösdürmek we döwrebap sanly çözgütleri döwlet edaralarynyň gündelik işlerine girizmage gönükdirildi. Bu barada BMGÖM habar berdi.

Telekeçiler, kiçi we orta telekeçiligiň hem-de startaplaryň wekilleri üçin aýratyn okuw maksatnamasy gurnaldy. Onda sanly dolandyryş, iş strategiýalarynyň taýýarlanylyşy, guramalaryň sanly ösüş derejesiniň seljermesi, kiberhowpsuzlyk, maglumatlary dolandyrmak hem-de döwlet edaralaryny sanlylaşdyrmakda halkara tejribeleri öwrenmek ýaly mowzuklar öz beýanyny tapdy.

Guramaçylaryň bellemegine görä, bu okuwlar durnukly sanly infrastrukturany döretmäge hem-de Türkmenistanyň sanly ykdysadyýet boýunça milli maksatnamasyny durmuşa geçirilmegine taýýarlyk görmekde möhüm ädim boldy.

Birleşen Milletler Guramasynyň Ösüş Maksatnamasy (BMGÖM) 1965-nji ýylda esaslandyrylyp, häzirki wagtda 177 ýurtda öz wekiliýetleri arkaly ykdysady ösüş boýunça dünýäniň iň giň gerimli hyzmatdaşlyk torlarynyň birini emele getirýär.