Türkmenistanyň Irlandiýa Respublikasyndaky Adatdan daşary we Doly ygtyýarly Ilçisi Ýazmyrat Serýaýew (oturýan ýeri London ş.) 2025-nji ýylyň 25-26-njy awgust aralygynda Dublin şäherinde iki ýurduň arasyndaky hyzmatdaşlygy giňeltmek maksady bilen iş maslahatlaryny geçirdi. Bu barada Türkmenistanyň Daşary işler ministrligi habar berýär.

Diplomat saparyň dowamynda Irlandiýanyň Daşary işler we söwda ministrliginiň Protokol bölüminiň başlygynyň orunbasary Ralf Wiktor bilen duşuşdy we ynanç hatynyň nusgalaryny gowşurdy. Irlandiýanyň Daşary syýasat edarasynyň wekili Ilçini täze wezipä bellenmegi bilen gutlap, onuň diplomatik işinde zerur bolan ýardamlary bermäge taýýardygyny tassyklady.

26-njy awgustda Ilçi Ýa.Serýaýew Irlandiýanyň Daşary işler we söwda ministrliginiň Syýasy meseleler boýunça direktorynyň orunbasary Fiona Nik Dhonnaça, “Global Ireland” baş direktory we ministrligiň ykdysady bölüminiň wekili Kolm Heýes bilen hem duşuşyklary geçirdi. 

Taraplar syýasy, söwda-ykdysady ugurlarda, şeýle hem gaýtadan dikeldilýän energetika we bilim pudaklarynda hyzmatdaşlygyň mümkinçiliklerini ara alyp maslahatlaşdylar. Halkara guramalarynyň çäklerindäki hyzmatdaşlyk meselelerine hem garaldy.

Ilçi irlandiýa tarapyna Türkmenistanyň parahatçylyk söýüjilikli we oňyn daşary syýasaty, daşary ýurtlar bilen dostlukly we deňhukukly gatnaşyklary, şeýle hem ýurduň ykdysady ösüşi barada gürrüň berdi.

Türkmenistan we Irlandiýa diplomatik gatnaşyklary 2007-nji ýylyň oktýabrynda ýola goýdy.