Türkmenistanyň Prezidenti Serdar Berdimuhamedow Ministrler Kabinetiniň anna güni sanly ulgam arkaly geçirilen Ministrler Kabinetiniň mejlisinde ýurduň welaýatlarynda 3-nji sentýabrda bugdaý ekişine girişmäge ak pata berdi. Bu barada Türkmenistanyň resmi metbugaty habar berýär.

Däbe görä, gallaçy daýhanlaryň möhüm we jogapkärli möwsüminiň badalgasy hormatly ýaşulular tarapyndan “bismilla” bilen başlanar.

Mejlisde Ministrler Kabinetiniň Başlygynyň orunbasary Tangryguly Atahallyýew gözegçilik edýän ulgamynda şu ýylyň ýanwar–awgust aýlarynda ýerine ýetirilen işleriň netijeleri we möwsümleýin oba hojalyk işleriniň geçirilişi barada hasabat berdi.

Hasabatda beýan edilişi ýaly, oba hojalyk pudagy boýunça önümçiligiň ösüş depgini geçen ýylyň degişli döwri bilen deňeşdirilende 110,4% barabar boldy. Şol sanda, Oba hojalyk ministrliginde bu görkeziji 102,4%, Suw hojalygy baradaky döwlet komitetinde 133,4%, “Türkmenpagta” döwlet konserninde 119,5%, “Türkmengallaönümleri” döwlet birleşiginde 103,8% deň boldy. Maýa goýum serişdelerini özleşdirmek boýunça meýilnama 245,3% ýerine ýetirildi.

Türkmenistanyň Prezidenti hasabaty diňläp, oba hojalyk pudagynda durmuşa geçirilýän düýpli özgertmeleriň ýokary hilli önümleri öndürmäge we ýurdumyzda azyk bolçulygyny üpjün etmäge gönükdirilendigini nygtady.

Hökümet mejlisinde şu ýylyň 8 aýynda Türkmenistanda ýerine ýetirilen işleriň jemi jemlenildi.