Türkmenistanyň Prezidenti Serdar Berdimuhamedow 29-njy awgustda telefon arkaly söhbetdeşligiň dowamynda Koreýa Respublikasynyň Prezidenti Li Çže Mýony 12-nji dekabrda Aşgabada geçiriljek halkara foruma gatnaşmaga çagyrdy. Forum Türkmenistanyň Prezidentiniň başlangyjy boýunça BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilendigi hem-de ýurduň hemişelik Bitaraplygynyň 30 ýyllygy mynasybetli guralar. Bu barada Türkmenistanyň resmi metbugaty habar berýär.

Söhbetdeşligiň başynda döwlet ýolbaşçylary birek-biregi mähirli gutlap, türkmen-koreý hyzmatdaşlygynyň ýokary derejede alnyp barylýandygyny nygtadylar. Türkmenistanyň Prezidenti Serdar Berdimuhamedow koreý kärdeşine täze saýlanan döwlet Baştutany hökmünde alyp barjak jogapkärli wezipesinde üstünlikleri arzuw etdi. Li Çže Mýon hem öz gezeginde mähirli sözler üçin minnetdarlyk bildirip, iki ýurduň arasyndaky gatnaşyklaryň strategik häsiýete eýedigini belledi.

Söhbetdeşligiň dowamynda taraplar özara gatnaşyklary giňeltmegiň mümkinçilikleri barada pikir alyşdylar. Söwda-ykdysady ulgamdaky hyzmatdaşlygy ösdürmek, koreý kompaniýalarynyň gatnaşmagynda iri senagat taslamalaryny durmuşa geçirmek, medeni-ynsanperwer gatnaşyklary ilerletmek hem-de halkara guramalardaky hyzmatdaşlygy berkitmek meseleleri ara alnyp maslahatlaşyldy. Şeýle-de hyzmatdaşlygyň sebit derejesindäki “Merkezi Aziýa — Koreýa Respublikasy” dialogunyň çäklerinde dowam etdirilmegi barada hem aýratyn nygtaldy.

Söhbetdeşligiň ahyrynda Koreýa Respublikasynyň Prezidenti çakylyk üçin hoşallyk bildirdi we Türkmenistanyň oňyn Bitaraplyk syýasatynyň halkara jemgyýetçiligi tarapyndan giň goldaw tapýandygyny belledi.