Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa ýakynda Hytaý Halk Respublikasyna amala aşyran iş saparynyň çäklerinde zenanlardan ybarat bolan türkmen wekiliýetine ýolbaşçylyk etdi. Oguljahan Atabaýewa ýurduň ýokary wezipeli ýolbaşçylary hem-de abraýly haýyr-sahawat guramalarynyň wekilleri bilen birnäçe duşuşyklary geçirdi. Bu barada Türkmenistanyň resmi metbugaty habar berýär.

Saparyň çäginde Oguljahan Atabaýewa Hytaýyň bilim ministri Huaý Szinpen, döwlet saglygy goraýyş komitetiniň başlygynyň orunbasary Zeng Ýisin, Sun Sinlin adyndaky gaznasynyň ýolbaşçysy Li Bin hem-de Şanhaý şäheriniň häkimi Gun Çžen bilen gepleşikleri geçirdi.

Taraplar häzirki zaman bilim we lukmançylyk programmalary boýunça tejribe alyşmak, şeýle hem ynsanperwer taslamalar boýunça bilelikdäki işleriň mümkinçilikleri barada pikir alyşdylar. Duşuşyklarda ikitaraplaýyn bilim ulgamyna we çaga saglygyny goramak meselelerine aýratyn üns berildi.

Türkmen tarapy Hytaýyň Howandarlyga mätäç we ýiti keselli çagalara bejergileri bermekde iş tejribesine, döwrebap bejeriş we dikeldiş usullaryna, şeýle hem saglygy goraýyş işgärleriniň hünär derejesini ýokarlandyrmak boýunça maksatnamalaryna uly gyzyklanma bildirdi.

Gurbanguly Berdimuhamedow adyndaky Haýyr-sahawat gaznasy bilen Sun Sinlin adyndaky gaznanyň arasynda özara düşünişmek hakynda Ähtnama gol çekildi. Bu resminama çaga saglygyny goramak, bilim maksatnamalary hem-de ynsanperwer hyzmatdaşlygy ösdürmek boýunça bilelikdäki işleri göz öňünde tutýar.

Hytaýyň medeni we bilim merkezlerine guralan gezelençleriň çäginde türkmen wekiliýeti bilim ulgamyndaky innowasion çözgütler we ýurduň milli däp-dessurlary bilen tanyşdy.