Türkmenıstanyň Prezidenti Serdar Berdimuhamedow duşenbe güni Hytaýyň Týanszin şäherinde geçen “ŞHG+” sammitindäki çykyşynda Türkmenistan ŞHG döwletlerine tebigy gazy ibermegiň möçberini artdyrmaga taýýardygyny aýtdy. Bu barada Türkmenistanyň resmi metbugaty habar berýär.

Döwlet baştutanynyň bellemegine görä, Türkmenistan energetika ulgamynda has ýakyn hyzmatdaşlyk ugrunda çykyş edýär we elektrik energiýasyny ibermek, onuň ugurlaryny hem-de möçberini giňeltmek ýaly meseleleri ara alyp maslahatlaşmak üçin açykdyr.

Türkmenıstanyň Prezidenti energetika ulgamyndaky hyzmatdaşlykdan başga, aragatnaşyk ulgamynda Türkmenistanyň häzirki wagtda ŞHG-a agza döwletleriň birnäçesi bilen hyzmatdaşlykda Owganystanyň üsti bilen Pakistana optiki-süýümli aragatnaşyk ulgamyny çekmek boýunça iri taslamany durmuşa geçirýändigini belläp, gurama täze giň möçberli taslamalaryň geografiýasyny giňeltmäge we kuwwatyny artdyrmaga işjeň gatnaşmagy teklip etdi.

“Ýurtlarymyzyň okgunly ykdysady ösüşi, täze senagat kärhanalarynyň barha artýan sany, öndürilýän harytlaryň we hyzmatlaryň görnüşleriniň giňeldilmegi — bularyň ählisi ykdysady hyzmatdaşlygymyzda öz beýanyny tapmalydyr. Şunuň bilen baglylykda, biz senagat kooperasiýasy strategiýasyna gatnaşmaga taýýardyrys.”- diýip Türkmenistanyň Prezidenti Serdar Berdimuhammedow belledi.

Tebigy gazyň baý gorlaryna eýe bolan Türkmenistan bu ugurda dünýäde dördünji orny eýeleýär. “Nebit-Gaz” elektron gazetiniň habar bermegine görä,  2024-nji ýylda Türkmenistanda 77,6 milliard kubmetr tebigy gaz we 8,3 million tonna nebit çykardy.