Türkmenistan Hytaý bilen özara haryt dolanyşygynyň möçberini artdyrmak boýunça bilelikde tagalla etmegi teklip edip, hususan-da Hytaýa dokma, himiýa senagaty, oba hojalygy hem-de nebit önümleriniň eksportyny giňeltmäge taýýardygyny mälim etdi. Bu barada Türkmenistanyň Prezidenti Serdar Berdimuhamedow sişenbe güni Pekin şäherinde Hytaýyň Kommunistik partiýasynyň Merkezi komitetiniň Syýasy býurosynyň hemişelik komitetiniň agzasy, Hytaý Halk Respublikasynyň Döwlet Geňeşiniň Premýeriniň birinji orunbasary Din Sýuesýan bilen geçirilen duşuşygynda aýtdy diýip, Türkmenistanyň resmi metbugaty habar berýär.

Duşuşykda taraplar özara gatnaşyklaryň strategik we uzak möhletli häsiýetini aýratyn nygtap, bilelikdäki işleriň utgaşdyrylmagynda Hökümetara komitetiň möhüm ornuna ünsi çekdiler.

Türkmenistanyň Prezidenti Serdar Berdimuhamedow Türkmenistanyň Ylymlar akademiýasynyň Halkara ylmy-tehnologiýa parkynyň, Oguz han adyndaky Inžener-tehnologiýalar uniwersitetiniň, Telekommunikasiýalar we informatika institutynyň mümkinçiliklerini ulanyp ýokary tehnologiýalar, şol sanda emeli aň tehnologiýalary ulgamynda hyzmatdaşlygy ösdürmek babatda anyk teklipleri hem beýan etdi.

2024-nji ýylda Türkmenistanyň bilen Hytaýyň arasyndaky söwda dolanyşygy 10,6 milliard ABŞ dollaryna deň boldy. Türkmenistanyň Hytaýa eksportynyň agramly bölegini turba geçirijiler arkaly iberilýän tebigy gaz düzýär.