Türkmenistan Demirgazyk–Günorta halkara ulag geçelgesiniň çäklerinde söwda gatnaşyklaryny we ýük gatnawlaryny giňeltmek maksady bilen Eýranyň demirgazyk portlary, aýratyn-da Amirabad porty bilen hyzmatdaşlygy berkitmäge taýýardygyny mälim etdi. Bu barada Türkmenistanyň Demir ýol ulaglary ministri Mammet Akmämmedow, Eýranyň Mazenderan welaýatynyň häkimi Mehdi Ýunusi Rostami bilen geçiren duşuşygynda aýtdy diýip, IRNA agentligi habar berdi.

Ministriň bellemegine görä, Eýranyň demirgazyk sebitlerindäki döwrebap ulag infratsrukturasy iki ýurduň arasyndaky ykdysady gatnaşyklary ösdürmek üçin täze mümkinçilikleri açar. Şeýle hem ol Amirabad portunyň Türkmenistanyň we Eýranyň arasyndaky söwda hem-de ýük daşamak ulgamyny giňeltmekde möhüm orun eýeleýändigini aýratyn nygtady.

Habarda bellenilişi ýaly, Demirgazyk–Günorta halkara ulag geçelgesi Eýran bilen Türkmenistandan geçip, Hindi ummanyndaky ýurtlary Baltika we Skandinawiýa sebitleri bilen baglanyşdyrýar. Mazenderan welaýatynyň amatly geografiki ýerleşişi sebitde söwda ýolunyň ösdürilmegine möhüm goşant goşar.

Demirgazyk–Günorta halkara ulag geçelgesi multimodal ugur bolup, onuň umumy uzynlygy 7200 kilometrden gowrakdyr. Bu alternatiw ýol Ýewropany, Pars aýlagynyň we Hindi umman ýurtlaryny Sues kanaly arkaly özara baglanyşdyrýan möhüm halkara ulag gatnawlarynyň biridir.