Azerbaýjanyň Şuşa şäherinde ýekşenbe güni geçirilen Türki döwletleriň ätiýaçlandyryjylarynyň ilkinji Assambleýasynyň çäklerinde türki dünýäsiniň ätiýaçlandyryş kompaniýalarynyň wekilleri bilelikdäki Jarnama gol çekdiler.

Resminama Türk döwletleriniň guramasynyň maksatlaryna we ýörelgelerine laýyklykda Türk dünýäsi ätiýaçlandyryş birleşiginiň täzeden gurulmagyny berkidýär. Bäş esaslandyryjy döwletler bilen birlikde, birleşige synçy hökmünde Wengriýanyň, Türkmenistanyň hem-de Demirgazyk Kipr Tükiýe Respublikasynyň ätiýaçlandyryş birleşikleri goşuldy. Bu barada Azerbaýjanyň Döwlet habarlar agentligi (AZERTAC) habar berýär.

Birleşigiň esasy maksady — gatnaşyjy we synçy ýurtlaryň ätiýaçlandyryş bazarlarynyň arasynda tejribe, işgärler we maglumat alyş-çalyşyny ýola goýmak, ätiýaçlandyryş gatnaşyklaryny ösdürmek hem-de ätiýaçlandyryş pudagynyň durnukly we dowamly ösüşini üpjün etmekden ybaratdyr.

Türki döwletleriň guramasy – türki dilli ýurtlaryň arasynda syýasy, ykdysady, ylym-bilim, ulag we syýahatçylyk ulgamlarynda hyzmatdaşlygy giňeltmek maksady bilen döredilen döwletara bileleşigidir.

Azerbaýjan, Gazagystan, Gyrgyzystan, Türkiýe we Özbegistan guramanyň agzalary bolup durýar. Wengriýa, Türkmenistan, Demirgazyk Kipr Tükiýe Respublikasy gurama synçy agza hökmünde gatnaşýar.