Türkmenistan, Azerbaýjan we Özbegistan söwda-ykdysady gatnaşyklaryny giňeltmäge hem-de birnäçe esasy ugurlar boýunça hyzmatdaşlygy çuňlaşdyrmaga taýýardyklaryny beýan etdiler. Bu barada anna güni “Awaza” milli syýahatçylyk zolagynda geçirilen üçtaraplaýyn duşuşykda Azerbaýjan Respublikasynyň ykdysadyýet ministri Mikail Jabbarow aýtdy diýip, “Trend” agentligi habar berýär.

Mikail Jabbarowyň sözlerine görä, hyzmatdaşlygyň täze görnüşi ähli ugurlar boýunça gatnaşyklaryň ösdürilmegine goşmaça mümkinçilikleri döredýär. "Döwlet Baştutanlarynyň tabşyrygy  boýunça biz hyzmatdaşlarymyz bilen bilelikde söwda-ykdysady we ulag gatnaşyklaryny giňeltmek, şeýle-de energetika hyzmatdaşlygyny pugtalandyrmak ugrunda işler alyp barýarys” –  diýip, ministr nygtady.

Mikail Jabbarow duşuşygyň jemleri boýunça bilelikdäki beýannamalaryň kabul ediljekdigine ynam bildirdi hem-de anyk iş çözgütleriniň we hereket edýän mehanizmleriň bardygyny aýratyn belledi. “Bu başlangyç ýurtlarymyzyň ykdysadyýetlerini has-da ýakynlaşdyrar, ulag ulgamyndaky aragatnaşygy we energetika hyzmatdaşlygy ösdürer” –  diýip, Mikail Jabbarow belledi.

Ministr şeýle hem ynsanperwer ulgamynda hyzmatdaşlygyň ösdürilmeginiň ähmiýetine üns çekdi we üç ýurduň Liderleriniň kesgitlän kararlarynyň yzygiderli durmuşa geçiriljekdigine ynam bildirdi.

2025-nji ýylyň 22-nji awgustynda “Awaza” milli syýahatçylyk zolagynda “Azerbaýjan – Türkmenistan – Özbegistan” formatyndaky üçtaraplaýyn duşuşyk geçirilýär.